Pas debateve të shkaktuara në opinionin publik lidhur me propozimin për Reformën Administrativo-Territoriale 2.0, Grupi Parlamentar i Partisë Socialiste ka reaguar për të sqaruar se konsolidimi territorial nuk nënkupton shkrirjen apo zhdukjen e qyteteve dhe bashkive.

Në një deklaratë zyrtare, PS thekson se bashkitë e përfshira në proces do të ruajnë emrin, identitetin dhe qendrën e tyre urbane, ndërsa do të bëhen pjesë e një strukture të re administrative përmes bashkimit me bashkitë fqinje.

Sipas sqarimit, këto qendra do të vijojnë të kenë statusin e qytetit përbërës brenda njësisë së re vendore.

Po ashtu, socialistët bëjnë të ditur se çdo qendër e prekur nga reforma do të ketë përfaqësim institucional përmes një nënkryetari përgjegjës, si dhe përfaqësim në këshillin bashkiak. Gjithashtu, ato do të kenë rol në planifikimin vendor, organizimin e shërbimeve dhe administrimin e çështjeve të komunitetit.

Sipas PS-së, qëllimi i Reformës Administrativo-Territoriale është rritja e efikasitetit të qeverisjes vendore, duke garantuar njëkohësisht ruajtjen e identitetit historik dhe lidhjes së qytetarëve me territorin ku jetojnë.

Reagimi vjen pasi propozimi për reformën, i depozituar në Kuvend, parashikon konsolidimin e disa bashkive ekzistuese, çka ka ngjallur diskutime dhe shqetësime në disa zona të vendit.

Reagimi i plotë:

Përshëndetje,

Një sqarim dhe informacion shtesë në lidhje me lajmet që po qarkullojnë nëpër media sa i takon procesit të Reformës Administrativo – Territoriale.

Konsolidimi territorial nuk sjell “zhdukjen” e asnjë bashkie apo qyteti.

Bashkitë e përfshira në këtë proces ruajnë emrin, identitetin dhe qendrën e tyre urbane. Ato përfshihen në një strukturë të re administrative përmes bashkimit me bashkitë fqinje, duke vijuar të kenë statusin e qytetit përbërës brenda njësisë së re vendore.

Çdo qendër e prekur nga ky proces do të vijojë të ketë përfaqësim institucional, përmes nënkryetarit përkatës dhe përfaqësimit në këshillin bashkiak, si dhe një rol të përcaktuar në planifikimin vendor, organizimin e shërbimeve dhe administrimin e çështjeve të komunitetit.

Ky proces synon një organizim më efikas të qeverisjes vendore, duke ruajtur identitetin, historinë dhe lidhjen e drejtpërdrejtë të qytetarëve me territorin ku jetojnë