Detaje të reja janë zbardhur nga ngjarja në një kopsht privat në Tiranë, ku një edukatore 32-vjeçare u arrestua pasi dyshohet se ushtroi dhunë fizike ndaj një fëmije 2-vjeçar.

Sipas burimeve, edukatorja Brunilda Haxhiu ka deklaruar gjatë dëshmisë së saj se e kishte goditur fëmijën me shpullë, pasi ai nuk po e zinte gjumi dhe ajo nuk kishte mundur ta duronte më situatën.

Ngjarja u denoncua nga babai i të miturit, i cili vuri re shenja dhune në fytyrën e fëmijës. Pas denoncimit, 2-vjeçari u dërgua për ekzaminime mjekësore, ku u konstatuan skuqje në zonën e veshit dhe nxirje në faqe.

Sipas hetimeve paraprake, pamjet filmike të siguruara nga ambientet e kopshtit kanë konfirmuar dyshimet se edukatorja ka ushtruar dhunë fizike ndaj të miturit.

Materialet procedurale i janë referuar Prokurorisë për veprime të mëtejshme, ndërsa vijojnë hetimet për zbardhjen e plotë të rrethanave të ngjarjes.