Pas rreth 24 orësh i bllokuar në një terren të vështirë malor, është bërë i mundur shpëtimi i një turisti polak në malin e Çikës, në Vlorë.

Shtetasi polak kishte nisur ditën e djeshme eksplorimin e zonës malore, por gjatë lëvizjes në terren pësoi dëmtime dhe nuk mundi të vijonte rrugën. Për shkak të terrenit të thepisur dhe kushteve të vështira, ai mbeti i izoluar dhe kërkoi ndihmë.

Pas marrjes së njoftimit, në zonë u angazhuan dy grupe kërkim-shpëtimi, të përbëra nga efektivë të Policisë së Vlorës, shërbimet zjarrfikëse dhe strukturat e zonave të mbrojtura. Pas disa orësh kërkimesh, ekipet arritën të lokalizonin turistin dhe nisën operacionin për nxjerrjen e tij nga zona.

Për shkak të terrenit të vështirë dhe pamundësisë së transportimit me mjete tokësore, u kërkua edhe ndërhyrja ajrore. Operacioni përfundoi me sukses dhe turisti u nxor nga zona e rrezikshme, duke marrë ndihmën e nevojshme mjekësore.

Mali i Çikës, me lartësi 2 044 metra, është një nga zonat më të vështira malore në jug të Shqipërisë dhe pjesë e Parkut Kombëtar të Llogorasë. Gjatë sezonit turistik ai vizitohet nga shumë turistë vendas e të huaj, por terreni i thepisur dhe mungesa e përgatitjes për kushtet malore mund të sjellin situata të rrezikshme.