Prokurori Klodian Braho ka deklaruar se në lidhje me çështjen e njohur si “Albanian File” janë depozituar dy materiale kallëzuese, të cilat aktualisht ndodhen në fazën e verifikimit.

Braho tha se për momentin nuk mund të japë detaje të tjera, pasi organi i akuzës është duke shqyrtuar pretendimet dhe faktet e paraqitura në kallëzime.

“Janë depozituar dy materiale kallëzuese. Aktualisht ndodhen në fazën e verifikimit, ndaj nuk kam komente për to. Do të sqarohet çdo pretendim dhe çdo fakt që i vihet në dispozicion Prokurorisë. Kur ekzistojnë shkaqe ligjore, fillon hetimi; kur ato mungojnë, hetimi nuk fillon”, u shpreh Braho.

Prokuroria pritet të vlerësojë materialet e administruara dhe, në varësi të verifikimeve, do të vendosë nëse do të nisë ose jo një procedim hetimor.