MALTË, 30 korrik 2026 – Një moment i papritur gjatë performancës së Katy Perry në festivalin “Isle of MTV Malta” ka tërhequr vëmendjen e fansave në mbarë botën, pasi një nga skenat spektakolare të koncertit nuk shkoi sipas planit.

Gjatë interpretimit të hitit të saj “I Kissed a Girl”, këngëtarja hyri brenda një shisheje gjigante transparente, një element skenik i konceptuar për të lëvizur mbi publik dhe më pas për t’u rikthyer në skenë.

Por gjatë realizimit të këtij truku, ndërhyrja e fansave bëri që shishja të drejtohej në kahun e kundërt nga ai i planifikuar. Katy Perry u përpoq t’u tregonte spektatorëve drejtimin e duhur, ndërsa situata krijoi disa momente konfuzioni mes publikut.

Pas disa çastesh, fansat arritën ta orientonin sërish strukturën gjigante drejt skenës dhe këngëtarja vijoi performancën e saj pa probleme.

Momenti u shpërnda me shpejtësi në rrjetet sociale, ku shumë ndjekës e cilësuan incidentin si një nga situatat më argëtuese të koncertit. Vetë Katy Perry e priti me humor këtë të papritur gjatë shfaqjes së saj.