HIMARË, 30 korrik 2026 – Një ngjarje e rëndë është shënuar në zonën e Porto Palermos, pranë Qeparoit, ku një 65-vjeçar ka humbur jetën pasi dyshohet se një lëndë plasëse artizanale i ka shpërthyer në dorë gjatë peshkimit.

Sipas të dhënave paraprake, 65-vjeçari Pandeli Merkuri ishte duke peshkuar duke përdorur një mjet shpërthyes të improvizuar, kur lënda dyshohet se ka shpërthyer aksidentalisht në duart e tij.

Si pasojë e shpërthimit, ai ka pësuar dëmtime të rënda në trup dhe në gjymtyrë. Pavarësisht transportimit drejt spitalit, i moshuari nuk ka mundur t’u mbijetojë plagëve dhe ka ndërruar jetë gjatë rrugës.

Policia ka nisur hetimet për zbardhjen e plotë të rrethanave të ngjarjes dhe për të përcaktuar mënyrën e përdorimit të lëndës plasëse.

Himarë/Informacion paraprak

Rreth orës 09:00, në afërsi të zonës së Porto Palermos, dyshohet se shtetasi P. M., 65 vjeç, gjatë peshkimit të paligjshëm me lëndë plasëse (dinamit), është dëmtuar nga shpërthimi i lëndës plasëse.

65-vjeçari u transportua për ndihmë mjekësore në Qendrën Shëndetësore Himarë, por, si pasojë e dëmtimeve të marra, humbi jetën.

Grupi hetimor, nën drejtimin e Prokurorisë, po vijon veprimet për zbardhjen dhe dokumentimin e plotë të rrethanave të ngjarjes.