SHKODËR, 30 korrik 2026 – Familjarë, miq dhe banorë të zonës do t’i japin sot lamtumirën e fundit Bleona Çelajt, 24 vjeçe, dhe dy fëmijëve të saj të mitur, Amari 3 vjeç dhe Anuari 1 vjeç, të cilët humbën jetën tragjikisht nga zjarri në banesën e familjes në fshatin Domen të Postribës.

Ceremonia mortore do të zhvillohet këtë të enjte, më 30 korrik, në orën 15:00, ndërsa varrimi do të kryhet në varrezat e Domnit, sipas njoftimit të bërë nga familjarët.

Pritja e ngushëllimeve do të zhvillohet në zonën “Shpëtimi” në Golem, ndërsa familja do të presë vizita ngushëllimi për tre ditë.

Ngjarja e rëndë ndodhi të mërkurën, kur banesa e vjetër ku ndodheshin nëna dhe dy fëmijët u përfshi nga flakët, duke shkaktuar humbjen e tre jetëve.

Tragjedia ka tronditur opinionin publik, ndërsa autoritetet vijojnë hetimet për zbardhjen e plotë të rrethanave të zjarrit. Sipas hetimeve paraprake, një nga pistat që po verifikohet lidhet me mundësinë e një defekti apo rrjedhjeje nga një bombol e vogël gazi.

Familja Çelaj, e cila jetonte në Gjermani, kishte ardhur në Shqipëri për pushime dhe kishte shkuar në banesën e vjetër familjare në Domen për ta pastruar dhe për të kaluar disa orë aty, por vizita u kthye në një tragjedi të rëndë.