UKRAINË, 30 korrik 2026 – Të paktën tetë persona humbën jetën gjatë sulmeve ajrore ruse të zhvilluara gjatë natës në Ukrainë, mes tyre gjashtë anëtarë të së njëjtës familje në rajonin e Kryvyi Rih. Sulmet ndodhën vetëm pak orë pasi presidenti ukrainas, Volodymyr Zelensky, paralajmëroi për një ofensivë masive nga Rusia.

Sipas kreut të administratës ushtarake të Kryvyi Rih, Oleksandr Vilkul, një raketë Iskander-M, e lëshuar nga rajoni rus i Voronezhit, goditi drejtpërdrejt banesën e familjes Voronov në fshatin Novopiliya. Si pasojë e sulmit, humbën jetën katër të rritur dhe dy vajza, të moshës 5 dhe 12 vjeç.

Nga i njëjti sulm mbetën të plagosur edhe tetë persona të tjerë, mes tyre dy fëmijë, djem të moshës 6 dhe 15 vjeç. Këshilli i qytetit të Novopiliyës shprehu ngushëllimet për familjen e goditur nga tragjedia.

Sulmet prekën edhe zona të tjera të Ukrainës. Në rrethin Brovary, pranë Kievit, pesë persona u plagosën, përfshirë një fëmijë dhe dy gra.

Ndërkohë, në qytetin e Poltavës, një sulm me dron ndaj zyrave të një kompanie private shkaktoi vdekjen e një personi, sipas autoriteteve ushtarake lokale. Në Lviv, në perëndim të Ukrainës, të paktën pesë persona u plagosën, ndërsa kryebashkiaku bëri të ditur se ekipet e shpëtimit po kërkonin persona të bllokuar nën rrënojat e një ndërtese të shembur nga bombardimet.