Situata në Lindjen e Mesme është përshkallëzuar ndjeshëm, pasi ushtria e Shteteve të Bashkuara ka ndërmarrë sulme ajrore ndaj objektivave në Iran. Sipas Komandës Qendrore të SHBA-së (CENTCOM), operacioni erdhi si përgjigje ndaj sulmeve me raketa balistike të kryera nga Irani kundër forcave amerikane të dislokuara në rajon.

Në një njoftim të publikuar në platformën X, CENTCOM bëri të ditur se sulmet nisën rreth orës 20:00 sipas orës lokale (03:00 sipas orës së Greqisë), duke i cilësuar ato si një kundërpërgjigje ndaj sulmit iranian të një dite më parë.

Sipas raportimeve të mediave ndërkombëtare, pas nisjes së operacionit u dëgjuan shpërthime në disa zona të jugut të Iranit. Ndërkohë, forcat amerikane vijojnë zbatimin e bllokadës detare ndaj Iranit, duke ridrejtuar 20 anije tregtare.

Sulmet erdhën vetëm pak orë pasi presidenti i SHBA-së, Donald Trump, paralajmëroi një reagim ushtarak ndaj veprimeve të Teheranit.

"Ne do t’i godasim shumë fort, sepse tani është radha jonë për të goditur. Ata e dinë se po vjen", deklaroi Trump para gazetarëve në Zyrën Ovale.

Një natë më parë, Garda Revolucionare e Iranit lëshoi disa raketa balistike drejt pozicioneve amerikane në Lindjen e Mesme. Sipas ushtrisë jordaneze, pesë prej raketave u interceptuan mbi territorin e Jordanisë.

Ndërkohë, autoritetet amerikane kanë bërë të ditur se operacionet ushtarake dhe masat detare ndaj Iranit do të vijojnë në kuadër të përgjigjes ndaj zhvillimeve të fundit në rajon.