Digjitalizimi i shërbimeve publike në Shqipëri po rrit me ritme të shpejta numrin e përdoruesve, veçanërisht mes të rinjve dhe qytetarëve në moshë aktive pune. Megjithatë, ky proces po thellon hendekun digjital për brezat më të moshuar, të cilët vijojnë të hasin vështirësi në përdorimin e platformës qeveritare e-Albania.

Sipas të dhënave më të fundit të INSTAT, grupmoshat 25–34 vjeç dhe 35–44 vjeç përbënin gjatë vitit 2025 rreth 51% të totalit të përdoruesve të platformës për shkarkimin dhe printimin e dokumenteve zyrtare. Edhe grupmosha 45–54 vjeç ruan një prani të konsiderueshme, duke zënë 23% të përdoruesve, ndërsa të rinjtë e moshës 16–24 vjeç përfaqësojnë rreth 15.4% të totalit.

Në të kundërt, pjesëmarrja e qytetarëve mbi 55 vjeç mbetet dukshëm më e ulët, pavarësisht se kjo kategori përbën mbi 40% të popullsisë së vendit. Të dhënat tregojnë një rënie të ndjeshme të përdorimit të shërbimeve digjitale nga kjo grupmoshë. Pesha e përdoruesve 55–64 vjeç është përgjysmuar brenda një viti, duke zbritur nga 16.5% në vitin 2024 në vetëm 7.2% në vitin 2025.

Situata paraqitet edhe më shqetësuese për grupmoshën 65–74 vjeç, e cila përfaqëson vetëm 2.8% të përdoruesve të platformës. Me kalimin e një numri gjithnjë e më të madh shërbimesh në format ekskluzivisht online, shumë të moshuar mbeten të varur nga ndihma e familjarëve ose e personave të tretë për të kryer procedurat administrative, shpesh duke përballuar edhe kosto shtesë për shërbime bazë, si sigurimi i një certifikate.

Ekspertët vlerësojnë se mungesa e njohurive digjitale, si dhe procedurat gjithnjë e më komplekse të identifikimit elektronik, përfshirë përdorimin e kodeve OTP (One-Time Password) përmes telefonit ose postës elektronike, krijojnë pengesa të konsiderueshme për qytetarët e moshës së tretë.

Ndërkohë, mungesa e pikave të asistencës publike dhe e programeve të trajnimit të përshtatura për pensionistët po e bën edhe më të vështirë integrimin e tyre në shërbimet digjitale, duke rritur rrezikun e përjashtimit nga aksesi i drejtpërdrejtë në shërbimet publike.