Një aksident i rëndë ajror ka tronditur Argjentinën, ku një helikopter është rrëzuar gjatë një stërvitjeje për shuarjen e zjarreve në pyje, duke i marrë jetën të shtatë anëtarëve të ekuipazhit.

Helikopteri i tipit Bell 412 u rrëzua pak minuta pas ngritjes në zonën e San Juanit. Në bord ndodheshin drejtues të Policisë, Shërbimit Zjarrfikës dhe Mbrojtjes Civile, të cilët po merrnin pjesë në një program trajnimi për menaxhimin e emergjencave të shkaktuara nga zjarret në pyje.

Sipas autoriteteve, mjeti ajror humbi kontaktin me kontrollin e trafikut ajror teksa fluturonte në një lartësi prej rreth 4 mijë metrash mbi nivelin e detit, pak para orës 10:30 me orën lokale. Edhe pse kushtet atmosferike ishin të favorshme për zhvillimin e stërvitjes, shkaqet e rrëzimit mbeten ende të paqarta dhe janë objekt i hetimeve.

Programi i trajnimit ishte organizuar nga Shërbimi Kombëtar i Zjarrfikësve dhe kishte si synim përgatitjen e rreth 50 pjesëtarëve të ekipeve lokale të emergjencës për ndërhyrje në rast zjarresh në pyje.

Autoritetet kanë konfirmuar se mes viktimave janë zëvendësshefi i Policisë së San Juanit, Marcelo Videla, shefi i zjarrfikësve, Ruben Castro, drejtori i Mbrojtjes Civile, Carlos Heredia, si dhe zëvendësshefi i zjarrfikësve, Jorge Carbajal.