Dibër – Do të zhvillohet të enjten ceremonia mortore për 33-vjeçarin shqiptar Roland Sala, i cili humbi jetën pas një aksidenti tragjik në det në ishullin e Kretës, Greqi.

Sipas njoftimit të publikuar nga faqja “Këtu mblidhen Dibranët”, ceremonia e varrimit do të mbahet më 30 korrik, në orën 11:00, në fshatin Çidhën, Dibër. Familjarët kanë njoftuar se pritja për ngushëllime do të organizohet në lokalin Hasan Krrashi.

33-vjeçari kishte qëndruar për rreth dy javë në gjendje kome, pasi pësoi asfiksi në det, ku, sipas raportimeve, u mor nga dallgët gjatë pushimeve në ishullin e Kretës.

Roland Sala jetonte në Angli dhe kishte udhëtuar në Greqi për të kaluar pushimet me familjarët. Pavarësisht përpjekjeve të mjekëve, ai nuk arriti t’u mbijetonte dëmtimeve të marra dhe ndërroi jetë.

Ceremonia mortore do të zhvillohet në vendlindjen e tij, ku familjarë, të afërm dhe miq do t’i japin lamtumirën e fundit.