Tiranë – Deputeti i Partisë Socialiste, Erion Braçe, ka folur për tensionet dhe debatet brenda forcës politike ku bën pjesë, duke deklaruar se në Partinë Socialiste ekziston një përplasje e brendshme dhe se, sipas tij, ka individë që synojnë ta dëmtojnë politikisht.

Në një intervistë për emisionin "Now me Erla Mëhillin", Braçe tha se publikimi i informacioneve dhe diskutimeve nga mbledhjet e Grupit Parlamentar bëhet me qëllim diskreditimin e tij dhe largimin nga roli që ka brenda grupit.

Deputeti u ndal edhe te një episod i mëparshëm, duke kujtuar se pas incidentit ku disa deputete u goditën me vezë, ai kishte kërkuar në grupin parlamentar thirrjen e policisë. Sipas Braçes, ky mesazh u publikua më pas në media dhe u interpretua në mënyrë të shtrembëruar.

Ai pretendoi se raste të tilla nuk kanë prekur vetëm atë, por edhe deputetë të tjerë të Partisë Socialiste, duke i cilësuar si pjesë e një përpjekjeje për të goditur kundërshtarët brenda partisë.

"Ka një luftë të brendshme në PS", u shpreh Braçe, duke argumentuar se rrjedhja e informacionit nga mbledhjet dhe interpretimi i tij në publik synon të dëmtojë figurën e disa anëtarëve të grupit parlamentar.