Ministri i Turizmit, Kulturës dhe Sportit, Blendi Gonxhja, ka reaguar lidhur me protestën e zhvilluar në bulevard, duke kritikuar përdorimin e vezëve ndaj institucioneve dhe duke u bërë thirrje protestuesve të artikulojnë kërkesat e tyre përmes dialogut.

Gjatë një deklarate publike, Gonxhja u shpreh se veprime të tilla përdhosin simbolikën e vezës, të cilën e cilësoi si simbol të jetës, ndërsa theksoi se askush nuk ka të drejtë të poshtërojë institucionet apo reputacionin e shtetit.

“Vezët janë simbol i jetës, nuk ka pse të përdhoset simboli i vezëve, pasi simbolizon jetën dhe s’të jep asnjë të drejtë për të përdhosur askënd. Edhe nëse e keqja do ishim ne, nuk shkon që 25, 30 apo 100 veta të poshtërojnë një institucion dhe reputacionin e një shteti”, u shpreh ai.

Ministri shtoi se protestuesit duhet të organizohen dhe të paraqesin kërkesa konkrete, duke argumentuar se vendosja e dorëheqjes së qeverisë si kusht i parë e bën të pamundur adresimin e kërkesave të tjera.

“Unë dua, pa ju dhënë mend atyre, të mblidhen dhe të thonë: 1, 2, 3, 4, 5. Nëse nuk i realizon, atëherë do të dalim këtu dhe do të kërkojmë dorëheqjen tënde”, deklaroi Gonxhja.