Një aksident i rëndë rrugor është regjistruar këtë të mërkurë në autostradën “Ibrahim Rugova”, në segmentin Qafë Duhël, në drejtim të Prishtinës, ku një kamion u përplas me tre automjete.

Sipas të dhënave paraprake, si pasojë e përplasjes kanë mbetur të plagosur shtatë persona, të cilët kanë marrë ndihmën e parë dhe janë dërguar për trajtim mjekësor.

Në vendin e ngjarjes kanë mbërritur hetuesit e Njësisë së Autostradës së Policisë së Kosovës, të cilët kanë nisur hetimet për të zbardhur shkaqet e aksidentit.

Policia bëri me dije se qarkullimi nuk është bllokuar plotësisht, pasi njëri prej shiritave të autostradës ka mbetur i hapur për lëvizjen e automjeteve. Gjendja shëndetësore e të plagosurve pritet të përcaktohet pas ekzaminimeve mjekësore.