Ish-këshilltari kryesor mjekësor i Shtëpisë së Bardhë, Anthony Fauci, ka refuzuar t’u përgjigjet pyetjeve gjatë një seance dëgjimore në Senatin amerikan lidhur me menaxhimin e pandemisë COVID-19, duke përdorur të drejtën kushtetuese të garantuar nga Amendamenti i Pestë.

Fauci u paraqit para Komitetit të Sigurisë Kombëtare dhe Çështjeve Qeveritare të Senatit, në një seancë të drejtuar nga senatori republikan Rand Paul, një prej kritikëve më të zëshëm të rolit të tij gjatë pandemisë.

Me këshillën e avokatëve të tij, Fauci deklaroi se nuk do t’u përgjigjej pyetjeve që mund ta ekspozonin ndaj vetë-inkriminimit. Ai gjithashtu akuzoi Rand Paul për një fushatë të vazhdueshme politike ndaj tij.

Nga ana tjetër, senatori Paul kundërshtoi vendimin e Faucit për të heshtur, duke argumentuar se ai kishte detyrim t’i përgjigjej pyetjeve të Kongresit. Seanca u zhvillua në një atmosferë të tensionuar, me akuza të ndërsjella për motive politike.

Përplasja mes Faucit dhe Rand Paul, e cila ka vijuar prej vitesh, është rikthyer në qendër të debatit publik për shkak të diskutimeve mbi origjinën e COVID-19, financimin e kërkimeve shkencore dhe politikat e ndjekura gjatë pandemisë.

Pas seancës reagoi edhe presidenti amerikan Donald Trump, i cili deklaroi se administrata Biden i kishte dhënë Faucit “pushtet të madh dhe shkatërrues”, ndërsa përsëriti pretendimin se virusi COVID-19 kishte origjinën nga një laborator në Wuhan, një teori që Fauci e ka kundërshtuar vazhdimisht.