SHKODËR – Një ngjarje e rëndë ka tronditur fshatin Domën, në Njësinë Administrative Postribë të Shkodrës, ku një zjarr i rënë në një banesë i ka marrë jetën një 24-vjeçareje dhe dy fëmijëve të saj të mitur.

Policia bëri të ditur se zjarri shpërtheu rreth orës 13:10 në banesën në pronësi të shtetasit Blerina Çobaj.

Pas marrjes së njoftimit, në vendngjarje mbërritën shërbimet e Policisë dhe forcat zjarrfikëse, të cilat gjetën banesën të shkrumbuar.

Si pasojë e flakëve humbën jetën Blerina Çobaj, 24 vjeçe, si dhe dy fëmijët e saj, të moshës 3 vjeç dhe 1 vjeç e gjysmë. Trupat e viktimave u nxorën nga rrënojat e banesës pas ndërhyrjes së ekipeve të emergjencës.

Sipas informacioneve paraprake, familja jetonte në fshatin Golem dhe ishte rikthyer nga Gjermania më 15 korrik. Ditën e ngjarjes, e reja kishte shkuar së bashku me dy fëmijët në banesën e prindërve të saj në fshatin Domën për ta pastruar, kur objekti u përfshi nga flakët.

Shkaqet e zjarrit mbeten ende të paqarta. Grupi hetimor, nën drejtimin e Prokurorisë, ka nisur hetimet për të përcaktuar shkakun e rënies së zjarrit dhe për të dokumentuar plotësisht rrethanat e kësaj tragjedie.

Ngjarja ka tronditur banorët e zonës dhe ka sjellë dhimbje të thellë në komunitet, ndërsa autoritetet pritet të zbardhin në vijim dinamikën e plotë të incidentit.

Njoftimi i Policisë:

Rreth orës 13:10, në fshatin Domen, Shkodër, ka rënë zjarr dhe është djegur banesa në pronësi të shtetasit B. Ç. Shërbimet e Policisë dhe punonjësit e shërbimit zjarrfikës, pas marrjes së njoftimit, kanë shkuar në vendngjarje.

Nga veprimet e para dyshohet se, si pasojë e zjarrit, kanë humbur jetën shtetasja B. Ç., 24 vjeçe, dhe dy fëmijë të mitur, përkatësisht 3 vjeç dhe 1 vjeç e gjysmë. Grupi hetimor, nën drejtimin e Prokurorisë, po punon për përcaktimin e shkakut të rënies së zjarrit dhe dokumentimin e plotë të rrethanave të ngjarjes.