SHKODËR – Një ngjarje tragjike ka tronditur pasditen e së mërkurës fshatin Domën, në Njësinë Administrative Postribë, ku një zjarr që përfshiu një banesë u mori jetën tre personave.

Sipas informacioneve paraprake, viktima janë Leona Çelaj dhe dy fëmijët e saj të mitur, të moshës 1 vjeç e gjysmë dhe 3 vjeç.

Ekipet e kërkim-shpëtimit nxorën nga banesa trupin e pajetë të viktimës së tretë, duke konfirmuar bilancin tragjik të ngjarjes.

Menjëherë pas sinjalizimit, në vendngjarje mbërritën forcat zjarrfikëse, shërbimet e Policisë së Shtetit dhe grupi hetimor, të cilët po punojnë për shuarjen e plotë të flakëve, dokumentimin e ngjarjes dhe përcaktimin e shkakut të zjarrit.

Rrethanat në të cilat shpërtheu zjarri mbeten ende të paqarta, ndërsa hetimet vijojnë për të zbardhur dinamikën e plotë të ngjarjes.

Tragjedia ka tronditur komunitetin e zonës.