TIRANË – Prokuroria e Posaçme (SPAK) ka thirrur ish-zv.kryeministren Belinda Balluku që të paraqitet më 31 korrik, në kuadër të hetimeve për dosjen e tunelit të Llogarasë dhe Lotit 4 të Unazës së Madhe të Tiranës.

Sipas burimeve, Ballukut pritet t’i komunikohet vendimi për zgjatjen me tre muaj të afatit hetimor në çështjen ku ajo rezulton e pandehur së bashku me disa zyrtarë të tjerë.

Veprimet procedurale të SPAK kanë nisur me paraqitjen në Prokurorinë e Posaçme të ish-drejtorit të Autoritetit Rrugor Shqiptar (ARRSH), Gentian Gjyli. Ai, i shoqëruar nga avokati i tij Andi Skënderaj dhe një punonjës policie, pasi ndodhet në masën e arrestit në shtëpi, është njoftuar për zgjatjen e hetimeve me tre muaj.

Gjyli po hetohet për veprën penale “shkelja e barazisë së pjesëmarrësve në tendera apo ankande publike”.

Me zgjatjen e afateve hetimore, hetimet për këtë dosje pritet të vijojnë deri më 10 tetor.

Çështja përfshin procedurat e tenderimit dhe zbatimit të disa veprave të mëdha infrastrukturore, përfshirë tunelin e Llogarasë dhe Lotin 4 të Unazës së Madhe të Tiranës.