Prokurori i SPAK-ut, Adnan Xholi, ka dorëzuar zyrtarisht aplikimin për postin e Prokurorit të Përgjithshëm, duke u bërë kandidati i parë që hyn në garën për drejtimin e organit qendror të akuzës.

Xholi është një prej prokurorëve me përvojë në Prokurorinë e Posaçme Kundër Korrupsionit dhe Krimit të Organizuar. Gjatë karrierës së tij ka ushtruar edhe detyrën e drejtuesit të Seksionit Kundër Krimit të Organizuar në SPAK, ndërsa ka qenë i përfshirë në hetimin e disa çështjeve të rëndësishme.

Ai ka kandiduar më herët dy herë edhe për drejtimin e SPAK-ut, por në të dyja rastet nuk arriti të zgjidhej në krye të Prokurorisë së Posaçme.

Tashmë, Xholi synon postin e Prokurorit të Përgjithshëm. Gara është hapur nga Këshilli i Lartë i Prokurorisë, pasi mandati shtatëvjeçar i Prokurorit të Përgjithshëm në detyrë, Olsian Çela, përfundon në muajin dhjetor.

Afati për paraqitjen e kandidaturave përfundon më 1 gusht. Pas mbylljes së aplikimeve, Këshilli i Lartë i Prokurorisë do të nisë procesin e verifikimit të kandidatëve, i cili pritet të përfundojë deri më 14 gusht.

Gjatë këtij procesi, KLP-ja do të shqyrtojë nëse kandidatët plotësojnë kriteret ligjore dhe kushtetuese. Ata do t’u nënshtrohen gjithashtu intervistave dhe vlerësimeve që lidhen me përvojën profesionale, integritetin dhe aftësitë drejtuese.

Në përfundim, Këshilli i Lartë i Prokurorisë do t’i dërgojë Kuvendit emrat e tre kandidatëve më të vlerësuar. Më pas, Parlamenti do të zgjedhë Prokurorin e ri të Përgjithshëm.