PRISHTINË – Një aksident i rëndë në një kantier ndërtimi në Prishtinë i ka marrë jetën një punëtori 26-vjeçar, ndërsa një person tjetër ka mbetur i lënduar pas rrëzimit të një vinçi gjatë procesit të montimit.

Sipas Inspektoratit të Punës, vinçi u rrëzua teksa po montohej në kantier. Autoritetet kanë bërë të ditur se shkaku i incidentit ende nuk është përcaktuar dhe se do të kryhen ekspertizat e nevojshme për zbardhjen e plotë të rrethanave.

“Në këtë fazë është ende herët të nxirret një konstatim inspektues, pasi natyra dhe rrethanat e rastit kërkojnë hetime dhe ekspertiza të mëtejshme për të përcaktuar shkakun e saktë të aksidentit, si dhe përgjegjësinë lidhur me zbatimin e masave të sigurisë dhe shëndetit në punë”, thuhet në njoftimin e Inspektoratit të Punës.

Ndërkohë, Policia e Kosovës, në bashkëpunim me Prokurorinë Themelore në Prishtinë, ka nisur hetimet për të sqaruar rrethanat e ngjarjes.

“Njësitet policore kanë dalë në vendin e ngjarjes dhe kanë ndërmarrë veprimet e nevojshme. Aktualisht, në koordinim me prokurorin e shtetit, kanë filluar hetimet për sqarimin e plotë të rrethanave të rastit”, njoftoi policia.

Për aksidentin ka reaguar edhe kryetari i Prishtinës, Përparim Rama, i cili shprehu ngushëllimet për familjen e 26-vjeçarit dhe theksoi se siguria në vendin e punës duhet të jetë një standard i panegociueshëm.

Si pasojë e rrëzimit, vinçi u thye dhe ra mbi çatinë e një shtëpie pranë kantierit, duke shkaktuar dëme të konsiderueshme materiale. Pronari i banesës bëri të ditur se në momentin e incidentit nuk ndodhej askush brenda, duke shmangur kështu pasoja të tjera në njerëz.

Autoritetet pritet të publikojnë rezultatet e hetimeve dhe ekspertizës teknike pas përfundimit të procedurave përkatëse.