ITALI – Qeveria italiane ka vendosur të ulë përkohësisht taksën mbi naftën me 17 cent për litër, në një përpjekje për të zbutur ndikimin e rritjes së çmimeve të karburanteve dhe për të lehtësuar barrën financiare mbi qytetarët dhe bizneset.

Masa është miratuar përmes një dekreti qeveritar dhe do të jetë në fuqi të paktën deri më 6 gusht. Sipas autoriteteve italiane, ndërhyrja synon të frenojë efektet e rritjes së çmimeve të naftës, të cilat kanë goditur veçanërisht sektorët e transportit dhe bujqësisë.

Ministri i Ekonomisë, Giancarlo Giorgetti, deklaroi se qeveria do të mblidhet më 4 gusht për të vlerësuar zhvillimet e mëtejshme dhe për të shqyrtuar masa shtesë, nëse situata do ta kërkojë. Ai nuk përjashtoi mundësinë e ndërhyrjeve edhe në tregun e energjisë elektrike dhe gazit.

Kryeministrja Giorgia Meloni e cilësoi uljen e përkohshme të taksës si një reagim të domosdoshëm ndaj rritjes së kostove të karburanteve, duke theksuar se çmimet e larta të naftës ndikojnë jo vetëm te drejtuesit e mjeteve, por në të gjithë ekonominë, përmes rritjes së kostove të transportit, prodhimit dhe çmimeve për konsumatorët.

Sipas Melonit, masa nuk është një zgjidhje përfundimtare, por përfaqëson një ndërhyrje të menjëhershme për të përballuar pasojat e zhvillimeve ndërkombëtare dhe kufizimeve buxhetore.

Edhe Gjermania kishte zbatuar më herët një ulje të përkohshme të taksave mbi naftën dhe benzinën, por ajo përfundoi në fund të muajit qershor. Ndërkohë, përshkallëzimi i tensioneve ndërkombëtare ka sjellë një rritje të re të çmimeve të karburanteve gjatë muajve të fundit.