BELGJIKË – Komuniteti shqiptar në Belgjikë do të përfaqësohet me dy konkurrente në edicionin e ardhshëm të konkursit prestigjioz “Miss Belgium 2027”. Leona Krasniqi dhe Griselda Stragu janë konfirmuar zyrtarisht si pjesëmarrëse në garë, duke synuar të përfaqësojnë jo vetëm bukurinë, por edhe identitetin dhe vlerat shqiptare në një nga kompeticionet më të rëndësishme të Evropës.

Leona Krasniqi do të përfaqësojë qytetin e Antwerpenit me kodin MA29. Ajo e cilëson pjesëmarrjen në “Miss Belgium” si një mundësi për të promovuar kulturën shqiptare dhe për të nxitur angazhimin e të rinjve në shoqëri.

“Jam shumë e lumtur dhe mirënjohëse për këtë mundësi. Për mua, ‘Miss Belgium’ nuk është vetëm një konkurs bukurie, por edhe një platformë për të promovuar vlerat, kulturën dhe angazhimin e të rinjve në shoqëri. Mbështetja e komunitetit shqiptar do të thotë shumë për mua”, është shprehur Krasniqi.

Në garë do të jetë edhe Griselda Stragu, me origjinë nga Shkodra dhe prej vitesh me banim në Belgjikë. Ajo synon të përfaqësojë me dinjitet rrënjët e saj shqiptare, duke përcjellë mesazhin se suksesi ndërtohet mbi përkushtimin, punën dhe vetëbesimin, ndërsa bukuria shkon përtej pamjes së jashtme.

Për Griselda Stragun, pjesëmarrja në “Miss Belgium 2027” përbën një mundësi për të promovuar kulturën dhe identitetin shqiptar në një skenë ndërkombëtare, ndërsa rrugëtimi i saj pritet të ndiqet me interes nga komuniteti shqiptar në Belgjikë dhe më gjerë.

Pjesëmarrja e dy vajzave shqiptare në këtë kompeticion vjen në një periudhë kur të rinjtë shqiptarë po spikasin gjithnjë e më shumë në fusha të ndryshme, duke dëshmuar integrim të suksesshëm dhe potencial të lartë në arenën ndërkombëtare.