SLLOVENI – Egnatia i ka dhënë lamtumirën fazës kualifikuese të UEFA Champions League, pasi u mposht nga Celje pas goditjeve të penalltive në ndeshjen e kthimit të raundit të dytë. Pas barazimit 3-3 në sfidën e parë në Rrogozhinë, takimi në Slloveni u mbyll 2-2 edhe pas 120 minutave lojë, ndërsa vendasit triumfuan 4-1 nga pika e bardhë.

Kampionët e Shqipërisë e nisën mirë ndeshjen dhe kaluan në avantazh në minutën e 21-të falë një autogoli të Hrkas. Megjithatë, Celje reagoi shpejt dhe barazoi në minutën e 34-t me anë të Kvesiç, duke bërë që pjesa e parë të mbyllej në shifrat 1-1.

Me rezultatin e përgjithshëm në baraspeshë, kualifikimi u vendos në kohën shtesë. Në minutën e 97-të, Kvesiç realizoi nga pika e penalltisë për t’i dhënë avantazhin 2-1 skuadrës sllovene.

Egnatia nuk u dorëzua dhe në minutën e 114-të gjeti golin e barazimit me Smajlin, i cili kishte hyrë nga stoli, duke rikthyer sërish ekuilibrin dhe duke e çuar përballjen te goditjet e penalltive.

Nga pika e bardhë, fati nuk ishte në anën e kampionëve shqiptarë. Bitri dhe Ndreca gabuan në ekzekutimet e tyre, ndërsa Celje u tregua e saktë, duke fituar serinë e penalltive 4-1 dhe duke siguruar kualifikimin në raundin e tretë të Champions League.

Pavarësisht eliminimit, Egnatia zhvilloi një paraqitje dinjitoze dhe tregoi karakter deri në sekondat e fundit të sfidës. Rrugëtimi europian i skuadrës së drejtuar nga Nevil Dede nuk përfundon këtu, pasi kampionët shqiptarë do të vijojnë garën në raundin e tretë kualifikues të UEFA Europa League, ku do të përballen me kampionët e Irlandës, Shamrock Rovers.