BRAZIL – Një vendim i rrallë i autoriteteve sportive braziliane ka tërhequr vëmendjen e opinionit sportiv. Mbrojtësi i Internacional, Victor Gabriel, është pezulluar jo vetëm për një numër të caktuar ndeshjesh, por edhe deri në rikuperimin e plotë të kundërshtarit që ai dëmtoi gjatë një ndeshjeje të kampionatit brazilian.

22-vjeçari u ndëshkua me karton të kuq gjatë sfidës mes Internacional dhe Cruzeiro, e përfunduar me fitoren 2-1 të Cruzeiros, pas një ndërhyrjeje të rëndë ndaj sulmuesit Gabriel Pec.

Gjykata e Lartë e Drejtësisë Sportive (STJD) vendosi një pezullim minimal prej gjashtë ndeshjesh, ndërsa sanksioni do të mbetet në fuqi deri në momentin kur Pec të rikthehet në stërvitje, me një afat maksimal prej 180 ditësh.

Si pasojë e ndërhyrjes, Gabriel Pec pësoi frakturë të tibisë së majtë dhe sipas vlerësimeve mjekësore pritet të mungojë në fushë për tre deri në katër muaj.

Gjatë seancës dëgjimore, Victor Gabriel deklaroi se nuk kishte pasur qëllim të lëndonte kundërshtarin, duke shpjeguar se fusha ishte e lagësht dhe e rrëshqitshme, çka i bëri të humbiste kontrollin gjatë ndërhyrjes.

“Ishte një incident i pafat. I kërkova falje dhe i ofrova mbështetjen time të plotë”, u shpreh mbrojtësi.

Nga ana tjetër, prokuroria sportive argumentoi se ndërhyrja përbënte një rrezik të konsiderueshëm për integritetin fizik të kundërshtarit, megjithëse pranoi se nuk kishte prova për një veprim të qëllimshëm.

Vendimi i STJD-së konsiderohet i pazakontë në futbollin profesionist, pasi kohëzgjatja e pezullimit lidhet drejtpërdrejt me rikuperimin e lojtarit të dëmtuar, një masë që rrallë është aplikuar në kompeticionet sportive.

🟥 Victor Gabriel recebe cartão vermelho direto por entrada muito forte em Gabriel Pec.#futebol #internacional #cruzeiro #brasileirão #ge pic.twitter.com/wGkk5nS58J

— ge (@geglobo) July 23, 2026