Një nga ngjarjet më të rralla astronomike të dekadës do të ndodhë më 12 gusht 2026, kur një eklips i plotë diellor do të errësojë qiellin për rreth 90 sekonda, duke tërhequr rreth 500 mijë turistë drejt Spanjës dhe Portugalisë.

Fenomeni do të jetë i dukshëm në një brez rreth 300 kilometra të gjerë, që shtrihet nga Grenlanda dhe Islanda deri në Spanjë e Portugali. Në Itali, eklipsi do të shihet vetëm pjesërisht, ku Hëna do të mbulojë rreth 50% të diskut të Diellit.

Eklipsi do të zhvillohet mes orës 19:30 dhe 21:17, ndërsa faza e eklipsit të plotë do të zgjasë vetëm një minutë e gjysmë. Gjatë kësaj kohe pritet të ulen temperaturat, qielli të errësohet dhe të bëhen të dukshëm edhe yjet.

Ky është eklipsi i parë i plotë që Spanja do të përjetojë që nga viti 1905. Ndërkohë, vendi do të ketë mundësinë të vëzhgojë edhe dy eklipse të tjera të plota, më 2 gusht 2027 dhe 26 janar 2028, një rast i pazakontë për të njëjtin territor.

Autoritetet spanjolle dhe shumë bashki kanë përgatitur aktivitete të veçanta për këtë ngjarje, duke organizuar pika vëzhgimi larg ndriçimit artificial, si dhe shpërndarjen e syzeve të certifikuara për vëzhgimin e sigurt të Diellit.

Ekspertët paralajmërojnë se radiografitë, xhamat e errët, fundet e shisheve apo syzet e zakonshme të diellit nuk mbrojnë sytë nga rrezet e dëmshme. Për të shmangur dëmtimin e retinës, rekomandohet përdorimi vetëm i syzeve speciale të certifikuara për eklipset diellore.

Astronomët e konsiderojnë eklipsin e plotë diellor një nga fenomenet më spektakolare të natyrës, pasi mbivendosja pothuajse perfekte e Hënës me Diellin ndodh rrallë në të njëjtin vend, mesatarisht vetëm një herë në 375 vjet.