Policia greke ka arrestuar një 32-vjeçar shqiptar, i cili kërkohej për një tentativë vrasjeje të ndodhur në prill të vitit 2026 në qytetin e Patrës, ku një 22-vjeçar mbeti i plagosur me armë zjarri.

Arrestimi u krye në orët e para të mëngjesit të së martës, 28 korrik, gjatë një operacioni të koordinuar nga Drejtoria për Luftën kundër Krimit të Organizuar, me pjesëmarrjen e njësive speciale EKAM, Sektorit për Luftën kundër Zhvatjes dhe grupeve operacionale të Policisë greke.

Sipas autoriteteve, ndaj 32-vjeçarit ishte lëshuar një urdhër arresti për veprat penale të tentativës së vrasjes dhe shkeljes së legjislacionit për armëmbajtjen.

Policia greke bëri me dije se i arrestuari është person i njohur për organet e rendit, pasi rezulton i përfshirë më herët në vepra të ngjashme, si edhe në aktivitete të tjera kriminale.

Hetimet për zbardhjen e plotë të ngjarjes vijojnë, ndërsa autoritetet nuk kanë bërë publike identitetin e të arrestuarit.