Një shtetas shqiptar është arrestuar në Francë pasi kreu një fluturim mbi centralin bërthamor të Penly, në rajonin e Normandisë, në një lartësi më të ulët se kufiri i lejuar. Lajmi është publikuar nga media franceze Le Journal du Dimanche (JDD), e cila raporton se profili i të ndaluarit ka ngritur dyshime te hetuesit, të cilët nuk përjashtojnë as pistën e spiunazhit.

Sipas raportimit, i ndaluari dyshohet të jetë biznesmeni shqiptar Ermal Beqiri, i shpallur në kërkim nga SPAK në kuadër të hetimeve për çështjen e tenderave të Agjencisë Kombëtare të Shoqërisë së Informacionit (AKSHI). Megjithatë, identiteti i tij nuk është konfirmuar ende zyrtarisht nga autoritetet franceze apo shqiptare.

Sipas JDD, incidenti ndodhi të shtunën, kur një avion i vogël civil fluturoi mbi centralin bërthamor të Penly. Gjatë fluturimit, piloti zbriti nga rreth 3.700 këmbë në 3.500 këmbë, duke hyrë nën lartësinë minimale të lejuar për një zonë të klasifikuar si e ndjeshme.

Pas sinjalizimit, Forcat Ajrore dhe Hapësinore Franceze shoqëruan avionin deri në aeroportin e Albert, ku piloti u arrestua nga policia dhe u vendos në ndalim.

Raporti i medias franceze thekson se gjatë kontrollit fizik autoritetet gjetën tre pajisje AirTag të fshehura në rrobat e të ndaluarit. Ky element, sipas hetuesve, ka shtuar dyshimet se ai mund të ketë vepruar me udhëzime ose në interes të një personi tjetër, megjithëse deri tani nuk është ngritur asnjë akuzë për spiunazh.

Gjatë marrjes në pyetje, piloti ka deklaruar se ulja e lartësisë ishte një gabim dhe se në atë moment po fliste në telefon me nënën e tij. Megjithatë, sipas JDD, shpjegimet e tij janë konsideruar të paqarta, ndërsa edhe itinerari i fluturimit ka tërhequr vëmendjen e hetuesve.

Sipas medias franceze, ai u dënua me një gjobë prej 7.000 eurosh për shkeljen e rregullave të fluturimit dhe më pas iu referua Zyrës Qendrore për Luftën kundër Krimit të Organizuar (OCLCO). Raportohet gjithashtu se ndaj tij ekziston një urdhër kërkimi nga autoritetet shqiptare dhe se pritet të ndiqen procedurat për ekstradimin e tij.

Hetimet vijojnë, ndërsa autoritetet franceze nuk kanë konfirmuar zyrtarisht nëse rasti lidhet me spiunazh apo me ndonjë aktivitet tjetër të paligjshëm.

Artikulli i plotë nga LA JOURNAL DU DIMANCHE

Një shtetas shqiptar u ndalua pasi fluturoi mbi një central bërthamor në Normandi të Francës në një lartësi më të ulët se kufiri i lejuar. Profili i tij ka ngjallur dyshime te hetuesit, të cilët nuk e përjashtojnë pistën e spiunazhit.

Profili i të ndaluarit i ka habitur hetuesit. Sipas informacioneve tona, të shtunën pasdite një avion i vogël civil fluturoi në mënyrë të pazakontë mbi centralin bërthamor të Penly, në departamentin Seine-Maritime.

Ndërsa fluturonte në një lartësi prej 3.700 këmbësh (rreth 1.200 metra), piloti papritur uli avionin në 3.500 këmbë, pra nën kufirin ligjor të lejuar për fluturimin mbi një zonë të ndjeshme.

Pasi u njoftua menjëherë, Forcat Ajrore dhe Hapësinore Franceze dërguan një mjet ajror për ta shoqëruar avionin deri në aeroportin e Albert, në departamentin Somme. Atje, piloti pritej nga policia, e cila e arrestoi menjëherë dhe e vendosi në ndalim policor.

Profili i të dyshuarit, i marrë në pyetje nga hetuesit, ngre shumë pikëpyetje. Ermal B., shtetas shqiptar, është tashmë i njohur për drejtësinë franceze dhe atë shqiptare për mashtrim financiar, mashtrim në grup të organizuar, si dhe për aktivitete të ndryshme të paligjshme të lidhura me piraterinë kompjuterike. Përveç kësaj, ndaj tij ekziston edhe një urdhër kërkimi i lëshuar nga autoritetet shqiptare. (Dyshimet e para janë se Ermal B. është Ermal Beqiri por pritet konfirmimi zyrtar).

Një fakt i pazakontë ishte se gjatë kontrollit fizik, forcat e rendit gjetën tre pajisje AirTag të fshehura në rrobat e tij.

Këto pajisje të vogla GPS, të prodhuara nga Apple, përdoren për të lokalizuar dhe gjurmuar objektet ose personat që i mbajnë me vete.

Sipas informacioneve tona, ky detaj i ka orientuar hetuesit drejt një piste tjetër: piloti mund të ketë vepruar nën detyrimin ose kontrollin e një porositësi.

Përgjigjet e Ermal B. gjatë marrjes në pyetje u konsideruan të paqarta, ai deklaroi se kishte gabuar lartësinë e fluturimit dhe u tha hetuesve se ishte duke folur në telefon me nënën e tij në momentin kur kaloi mbi centralin bërthamor.

Gjithçka në versionin e tij ka ngritur dyshime, përfshirë edhe planin e fluturimit.

Ai ishte nisur nga qyteti i vogël Albert, kishte fluturuar drejt Calais, më pas kishte kaluar mbi Bretanjë, për të përfunduar duke kaluar mbi centralin bërthamor të Penly.

Centralet bërthamore në shënjestër të huajve

Sipas informacioneve tona, shtetasi shqiptar u dënua me procedurë të përshpejtuar me 7.000 euro gjobë për fluturim të ndaluar. Më pas ai iu dorëzua Zyrës Qendrore për Luftën kundër Krimit të Organizuar (OCLCO). Pas kësaj pritet të ekstradohet në Shqipëri.

Përveçse është një central bërthamor me rëndësi të madhe, Penly është edhe vendi ku po ndërtohen reaktorët e rinj bërthamorë EPR-2, një projekt që ndiqet me interes nga e gjithë bota.

Në vitin 2014, disa centrale bërthamore franceze ishin fluturuar nga dronë. Edhe muajt e fundit, disa dronë të paidentifikuar kanë kaluar mbi objekte të ndjeshme ose ushtarake.

Bëhet fjalë për një seri fluturimesh të organizuara me kujdes, të cilat autoritetet franceze ende nuk ia kanë atribuar zyrtarisht ndonjë shteti të huaj.

INFO JDD. Seine-Maritime : un Albanais survole illégalement une centrale nucléaire, son profil inquiète la police (lejdd.fr)