Gjermania ka shprehur gatishmërinë për të kandiduar për organizimin e një tjetër Kupe Bote, me Federatën Gjermane të Futbollit (DFB) që po shqyrton mundësinë për edicionin e vitit 2038 ose 2042.

Edhe pse proceset zyrtare të aplikimit nga FIFA për Kupat e Botës 2038 dhe 2042 nuk kanë nisur ende, disa vende kanë filluar të shfaqin interesin e tyre për të pritur turneun më të madh të futbollit në botë.

Axel Hellmann, anëtar i bordit drejtues të DFB-së, ka konfirmuar për The Athletic se Gjermania është e gatshme të rikthehet si organizatore pas eksperiencës së vitit 2006.

“Do të na pëlqente shumë. Ka një iniciativë nga Bernd Neuendorf dhe DFB për të ofruar për edicionin e vitit 2042, ndoshta edhe për vitin 2038. Kjo do të varet nga rregulloret e FIFA-s”, u shpreh Hellmann.

Sipas rregullave aktuale të FIFA-s për rotacionin kontinental, pas Kupës së Botës 2030, e cila do të zhvillohet në tre kontinente, përfshirë Evropën, turneu i vitit 2034 pritet të zhvillohet në Azi ose Oqeani.

Kjo e bën më të komplikuar një kandidaturë europiane për vitin 2038, pasi sipas parimit të rotacionit, gara do të duhej të rikthehej në një konfederatë tjetër. Megjithatë, Gjermania beson se mund të ketë mundësi për një kandidaturë të suksesshme në vitin 2042.

“Ka hapësirë për një ofertë për vitin 2038, por jam mjaft i bindur se kemi një shans shumë të mirë për një fushatë të suksesshme për vitin 2042”, tha Hellmann.

Interesi gjerman vjen në një kohë kur edhe vende të tjera europiane po shqyrtojnë kandidaturat e tyre. Franca është një tjetër pretendente e mundshme dhe një raport i porositur nga Ministria franceze e Sportit ka sugjeruar një bashkëpunim të mundshëm me Gjermaninë për të rritur shanset e një kandidature të përbashkët.

Megjithatë, vendimi përfundimtar do të merret nga presidenti i DFB-së, Bernd Neuendorf, dhe drejtuesit e federatës. Gjermania mund të zgjedhë një kandidaturë të vetme ose një bashkëpunim me një tjetër vend europian.

Gjermania ka organizuar Kupën e Botës një herë në historinë moderne, në vitin 2006, një turne i kujtuar për atmosferën e jashtëzakonshme dhe sloganin “Sommermärchen” (“Përralla e verës”).