Cristiano Ronaldo po përgatitet të nisë një kapitull të ri në karrierën e tij, kësaj radhe larg fushës së futbollit. Ylli portugez do të jetë pjesë e një seriali televiziv britanik me temë futbolli, ku do të angazhohet jo vetëm si aktor, por edhe në rolin e drejtorit ekzekutiv.

Seriali, i titulluar "Dita e Parë" (The First Day), do të rrëfejë historinë e një menaxheri futbolli dhe do të sjellë në ekran një kast me emra të njohur të sportit dhe kinemasë. Mes tyre do të jetë edhe ish-sulmuesi francez Thierry Henry.

Ky projekt shënon hyrjen e Ronaldos në botën e aktrimit, duke bashkuar pasionin e tij për futbollin me industrinë e filmit. Interesimi i pesë herë fituesit të “Topit të Artë” për kinemanë është bërë publik edhe më herët, ndërsa seriali i ri i jep mundësinë të provojë veten në një tjetër fushë.

Pavarësisht angazhimit në televizion, 40-vjeçari do të vazhdojë karrierën si futbollist te Al Nassr në Arabinë Saudite, ku synon të arrijë shifrën historike prej 1000 golash zyrtarë.

Ndërkohë, e ardhmja e tij me Kombëtaren e Portugalisë mbetet ende e paqartë.