LONDËR – Ambasada e Shqipërisë në Mbretërinë e Bashkuar ka reaguar ndaj një artikulli të publikuar nga BBC, duke kërkuar korrigjimin e një titulli që, sipas saj, përgjithësonte veprimet e disa individëve duke ia atribuar një komuniteti të tërë.

Artikulli i publikuar më 24 korrik kishte fillimisht titullin “Albanians used false papers for settlement scheme” (“Shqiptarët përdorën dokumente false për skemën e qëndrimit”). Sipas Ambasadës shqiptare, ky formulim krijonte përshtypjen se përgjegjësia për veprimet e tre personave u ngarkohej shqiptarëve si komunitet.

Pas reagimit zyrtar të Ambasadës, BBC ndryshoi titullin e artikullit në “Trio used false papers for settlement scheme” (“Tre persona përdorën dokumente false për skemën e qëndrimit”).

Në reagimin e saj, Ambasada shqiptare falënderoi qytetarët shqiptarë që ngritën shqetësimin për përdorimin e stereotipeve dhe theksoi rëndësinë e raportimit të saktë dhe të përgjegjshëm nga mediat.

Sipas Ambasadës, në rastet e çështjeve penale përgjegjësia është individuale dhe jo kolektive, ndërsa përdorimi i një kombësie në tituj për veprimet e disa personave mund të ndikojë në krijimin e paragjykimeve ndaj një komuniteti të tërë.

“Një formulim i tillë është i padrejtë, i pasaktë dhe stigmatizues. Kur një çështje penale ka të bëjë me individë të caktuar, përgjegjësia është individuale dhe jo kolektive”, thuhet në reagimin e Ambasadës.

Institucioni diplomatik bëri të ditur se do të vijojë të reagojë ndaj rasteve kur Shqipëria ose qytetarët shqiptarë trajtohen në mënyrë të padrejtë apo stereotipizuese në media, duke e cilësuar respektin për të vërtetën dhe dinjitetin e komuniteteve si një standard të rëndësishëm të gazetarisë dhe shoqërisë demokratike.