TIRANË – Gjykata e Apelit të Posaçëm ka rrëzuar ankimin e Jamarbër Malltezit dhe Argita Berishës për heqjen e masës së sekuestros ndaj 25 pasurive të paluajtshme.

Vendimi i shkallës së dytë lë në fuqi masën e vendosur më herët nga Gjykata e Posaçme, e cila kishte urdhëruar mbajtjen nën sekuestro të këtyre pasurive në kuadër të hetimeve për dosjen “Partizani”.

Sipas vendimit të Apelit, kërkesa e çiftit Malltezi për shfuqizimin e masës së sigurisë pasurore nuk është pranuar, duke konfirmuar vijimin e bllokimit të pronave.

Për sekuestrimin e 25 pasurive të Jamarbër Malltezit është shprehur më herët edhe Gjykata e Lartë, e cila la në fuqi vendimin për mbajtjen e tyre nën masën e sekuestros.

Pasuritë u sekuestruan nga Prokuroria e Posaçme (SPAK) gjatë fazës së hetimeve paraprake për çështjen e njohur si dosja “Partizani”.

Hetimet për këtë çështje vijojnë, ndërsa vendimet përfundimtare mbi përgjegjësitë ligjore do të përcaktohen nga procesi gjyqësor.