VIRGINIA – Një ngjarje e rëndë ka tronditur familjen e ndihmëstrajnerit të skuadrës së NFL-së, Kansas City Chiefs, Eric Bieniemy. Bashkëshortja e tij, Mia Bieniemy, 57 vjeçe, mbeti e plagosur pas të shtënave me armë zjarri në banesën e familjes në Ashburn, Virginia, ndërsa autoritetet kanë arrestuar djalin e tyre, Elijah Zion Bieniemy.

Sipas policisë së kontesë Loudoun, efektivët ndërhynë të dielën në mbrëmje pas një njoftimi për të shtëna me armë. Në vendngjarje, Mia Bieniemy u gjet e plagosur rëndë dhe u transportua menjëherë në spital. Autoritetet bëjnë të ditur se ajo ndodhet në gjendje të qëndrueshme.

Burime të ESPN raportojnë se 57-vjeçarja është qëlluar në kraharor dhe në krah.

Pas ngjarjes, policia arrestoi 27-vjeçarin Elijah Zion Bieniemy, i cili përballet me akuza për plagosje të rëndë, përdorim të armës së zjarrit gjatë kryerjes së një vepre penale dhe shkrepje të armës brenda një banese. Ai mbahet në paraburgim pa të drejtë lirimi me kusht, ndërsa hetimet vijojnë.

Pas marrjes së lajmit, Eric Bieniemy u largua nga kampi stërvitor i Kansas City Chiefs dhe mungoi në seancën stërvitore të së hënës.

Trajneri i ekipit, Andy Reid, shprehu mbështetjen e tij për kolegun dhe familjen e tij.

"Zemrat tona janë me Eric Bieniemy. Mia është në gjendje të qëndrueshme dhe kjo është një gjë pozitive. Të gjithë e duam Ericun dhe është e dhimbshme të shohësh situata të tilla," deklaroi Reid.

Ai shtoi se nuk është ende e qartë se kur Bieniemy do t’i rikthehet detyrës, ndërsa përgjegjësitë e tij do të mbulohen përkohësisht nga pjesëtarë të tjerë të stafit teknik.

Eric Bieniemy është një nga trajnerët më të njohur në futbollin amerikan. Gjatë karrierës së tij ka qenë pjesë e stafit të Kansas City Chiefs në fitimin e dy titujve Super Bowl, ndërsa më pas ka punuar edhe me skuadra të tjera të NFL-së, përpara rikthimit te Chiefs këtë sezon.