TIRANË – Pavarësisht përmirësimit të treguesve të tregut të punës gjatë vitit 2025, mijëra qytetarë me arsim të lartë vijojnë të mbeten të papunë. Sipas raportit "Tregu i Punës 2025" të INSTAT, në vend rezultojnë 17.800 persona me diplomë universitare në kërkim të një vendi pune, ku pjesa më e madhe janë të rinj.

Të dhënat tregojnë se 5.370 të papunë me arsim të lartë i përkasin grupmoshës 15–24 vjeç, ndërsa 4.323 janë të moshës 25–29 vjeç. Në total, 9.693 persona, ose rreth 55% e të gjithë të papunëve me diplomë universitare, janë nën moshën 30 vjeç, çka nxjerr në pah vështirësitë që hasin të rinjtë për t’u integruar në tregun e punës pas përfundimit të studimeve.

Sipas INSTAT, grupi i moshës 25–54 vjeç përbën numrin më të madh të të papunëve, me 11.284 persona, ndërsa numri i personave mbi 55 vjeç me arsim universitar që kërkojnë punë mbetet dukshëm më i ulët.

Në nivel kombëtar, gjatë vitit 2025 u regjistruan 107.548 persona të papunë. Prej tyre, 45.764 kishin arsim të mesëm, 43.984 arsim 8/9-vjeçar dhe 17.800 arsim të lartë. Kjo do të thotë se të diplomuarit përbëjnë rreth 16,5% të totalit të të papunëve në vend.

Raporti evidenton se sfida kryesore mbetet kalimi nga arsimi në punësim. Ekspertët e lidhin këtë situatë me mospërputhjen mes profileve të diplomimit dhe kërkesave reale të tregut të punës, ku ekonomia shqiptare krijon më shumë vende pune në sektorët e shërbimeve, turizmit, ndërtimit dhe tregtisë.

Një tjetër faktor është mungesa e përvojës profesionale dhe e aftësive praktike, teknologjike, gjuhësore dhe digjitale që kërkohen nga punëdhënësit. Gjithashtu, pritshmëritë më të larta të një pjese të të diplomuarve për pagën dhe pozicionin e punës ndikojnë në zgjatjen e periudhës së papunësisë.

Sipas raportit, forcimi i bashkëpunimit mes universiteteve dhe biznesit, zgjerimi i praktikave profesionale dhe orientimi më i mirë i karrierës konsiderohen elementë kyç për të lehtësuar integrimin e të rinjve në tregun e punës.