Presidenti i Ukrainës, Volodymyr Zelensky, do të zhvillojë këtë të martë një vizitë zyrtare në Mbretërinë e Bashkuar, ku do të takohet me kryeministrin britanik, Andy Burnham.

Takimi, i pari i një lideri të huaj me Burnham që prej marrjes së detyrës javën e kaluar, pritet të përqendrohet në forcimin e bashkëpunimit strategjik dhe ushtarak mes Londrës dhe Kievit, me theks të veçantë te teknologjia e dronëve.

Sipas një deklarate të Downing Street, kryeministri britanik do të rikonfirmojë mbështetjen e palëkundur të Mbretërisë së Bashkuar për Ukrainën në përballjen me agresionin rus.

Gjatë vizitës, Burnham dhe Zelensky pritet të vizitojnë një bazë detare, ku do të takohen me personel ushtarak britanik dhe ukrainas të angazhuar në stërvitje për pastrimin e minave detare, si pjesë e përgatitjeve për misionet e ardhshme në Detin e Zi.

Në një intervistë për Sky News, presidenti ukrainas u shpreh se vendi i tij është i gatshëm të ndajë me Britaninë përvojën e fituar në zhvillimin dhe përdorimin e dronëve.

"Ne jemi të gatshëm të ndajmë të gjitha njohuritë tona me Britaninë dhe shpresojmë që Britania të bëjë të njëjtën gjë. Kjo është arsyeja pse na duhet një marrëveshje shumë e fortë për dronët," deklaroi Zelensky.

Sipas Sky News, presidenti ukrainas synon gjithashtu ngritjen e një fabrike të madhe për prodhimin e dronëve në territorin britanik, një projekt që do të shënonte një fazë të re në bashkëpunimin strategjik mes Kievit dhe Londrës në fushën e mbrojtjes.

Pas vizitës në Britani, Zelensky do të udhëtojë drejt Uashingtonit, ku pritet të zhvillojë bisedime me presidentin amerikan Donald Trump. Në qendër të takimit do të jenë forcimi i mbrojtjes ajrore të Ukrainës dhe sigurimi i mbështetjes së mëtejshme ushtarake nga Shtetet e Bashkuara.

Ukraina po e shfrytëzon përvojën e fituar gjatë viteve të luftës në zhvillimin e teknologjisë së dronëve si një avantazh strategjik për të thelluar bashkëpunimin me partnerët ndërkombëtarë dhe për të siguruar mbështetje të re në sektorin e mbrojtjes.