Tiranë – Kryeministri Edi Rama ka njoftuar se ka propozuar dhënien e një page shtesë për të gjithë efektivët që do të angazhohen në përballimin e zjarreve gjatë sezonit veror.

Gjatë një takimi me zjarrfikësit dhe strukturat e Emergjencave Civile në Bazën Ajrore të Farkës, Rama tha se masa do të përfshijë forcat që janë pjesë e Ministrisë së Mbrojtjes dhe që do të angazhohen në operacionet për shuarjen e zjarreve.

Sipas kryeministrit, shpërblimi duhet të jepet menjëherë dhe jo në përfundim të sezonit, si një vlerësim për angazhimin e efektivëve në terren.

“Kam propozuar që të gjitha forcat që i përkasin Ministrisë së Mbrojtjes dhe do të përfshihen në këtë proces të shpërblehen menjëherë me një pagë ekstra”, deklaroi Rama.

Kreu i qeverisë u bëri gjithashtu thirrje bashkive që të ndjekin të njëjtën praktikë për zjarrfikësit dhe strukturat e tyre vendore.

“I bëj thirrje bashkive të bëjnë të njëjtën gjë për trupat e tyre dhe ta bëjnë menjëherë, pa pritur që të përfundojë e gjithë beteja”, u shpreh Rama.

Kryeministri theksoi se qeveria do të vijojë investimet për përmirësimin e kushteve të punës, rritjen e kapaciteteve operacionale dhe mbështetjen e strukturave të angazhuara në menaxhimin e emergjencave civile.