Kakavijë – Lëvizja në pikat kufitare mes Shqipërisë dhe Greqisë i është rikthyer normalitetit pas përfundimit të grevës katërorëshe të zhvilluar nga punonjësit e palës greke.

Greva, e cila preku pikat doganore të Kakavijës, Kapshticës, Qafë Botës dhe Tre Urave, shkaktoi vonesa të konsiderueshme dhe radhë të gjata automjetesh e udhëtarësh gjatë orëve të para të mëngjesit.

Fluksi i lartë i automjeteve, autobusëve dhe kamionëve krijoi radhë kilometrike, veçanërisht në pikat kufitare të Kakavijës dhe Kapshticës, ndërsa shumë qytetarë nuk kishin dijeni për pezullimin e përkohshëm të punës nga autoritetet greke.

Pas rreth katër orësh ndërprerje, procedurat e kalimit kufitar kanë rifilluar normalisht dhe qarkullimi në pikat doganore po vijon pa kufizime.