Tiranë – Pas përfundimit të marshimit në disa zona të kryeqytetit, protestuesit janë drejtuar drejt Komisariatit nr. 1 të Policisë, ku dyshohet se mbahen disa prej personave të shoqëruar gjatë protestës së sotme.

Më herët, protestuesit u grumbulluan në sheshin “Skënderbej”, ndërsa më pas vijuan marshimin drejt ambienteve të komisariatit.

Protesta nisi që në orët e para të mëngjesit, kur qytetarë të shumtë u mblodhën pranë Kuvendit të Shqipërisë. Organizimi i protestuesve kishte nisur rreth orës 08:30, ndërsa seanca plenare ishte parashikuar të zhvillohej në orën 10:00.

Gjatë tubimit u vu re një prani e shtuar e forcave të policisë, të cilat kishin vendosur një perimetër sigurie pranë Kuvendit për të shmangur përplasjet dhe për të garantuar hyrjen e deputetëve në ambientet e parlamentit.

Pavarësisht masave të sigurisë, gjatë protestës pati momente tensioni mes protestuesve dhe efektivëve të policisë. Disa persona u shoqëruan, mes tyre edhe Arben Kola.

Ndryshe nga protestat e mëparshme, organizatorët zgjodhën një tjetër formë veprimi, duke u vendosur në disa akse kryesore të kryeqytetit dhe duke bllokuar përkohësisht qarkullimin. Më pas, protestuesit u rikthyen pranë hyrjes së Kuvendit.