TIRANË – Qytetarë të mbledhur para Kuvendit të Shqipërisë kanë zhvilluar këtë të hënë protestën e 58-të radhazi, e cila përkon me zhvillimin e seancës së fundit plenare të këtij sesioni parlamentar.

Gjatë tubimit, protestuesit kanë hedhur thirrje kundër qeverisë dhe deputetëve, ndërsa kanë përsëritur disa nga sloganet e përdorura edhe në protestat e mëparshme. Mes thirrjeve të dëgjuara nga turma ishin "Parlament analfabetë", "Edi Rama o legen, gjithë Shqipëria të urren" dhe "Shqipëria e shqiptarëve, vdekje tradhtarëve".

Ndërkohë, Policia e Shtetit ka marrë masa të shtuara sigurie për mbarëvajtjen e protestës dhe zhvillimin normal të seancës plenare.

Perimetri i sigurisë pranë Kuvendit është përforcuar me një prezencë të shtuar të forcave policore, ku janë vendosur dy rreshta të forcave "Shqiponja" dhe një rresht i efektivëve të Forcës Kombëtare të Sigurisë (FNSH). Zona përreth Parlamentit vijon të monitorohet nga një numër i madh punonjësish policie.

Protesta po zhvillohet paralelisht me punimet e Kuvendit, ku deputetët janë mbledhur për seancën plenare të parashikuar në rendin e ditës.