PARIS – Franca ka nisur zbatimin e një programi të ri kontrollesh për përdorimin e drogës në administratën shtetërore, me synim garantimin e sigurisë dhe mbrojtjen e informacioneve sensitive.

Sipas kryeministrit francez Sébastien Lecornu, disa punonjës të ministrive janë larguar nga detyra pasi testet e tyre rezultuan pozitive. Vendimi për kontrolle të papritura dhe të paparalajmëruara ishte njoftuar disa javë më parë dhe kishte shkaktuar debate në opinionin publik.

Në një intervistë për revistën “Paris Match”, Lecornu deklaroi se masa nuk është marrë vetëm për të dhënë një shembull, por kryesisht për arsye sigurie.

"Shumë thonë se e bëra këtë për të dhënë një shembull në Francë. Kjo është e vërtetë. Por mbi të gjitha e bëra për arsye sigurie", u shpreh kryeministri francez.

Sipas tij, disa prej zyrtarëve dhe punonjësve të administratës kanë akses në informacione të klasifikuara dhe përdorimi i substancave të paligjshme mund të përbëjë rrezik për funksionimin e institucioneve shtetërore.

Në muajin qershor, Lecornu u dërgoi ministrive një udhëzim për kryerjen e testeve të detyrueshme dhe të rastësishme të pështymës për zbulimin e përdorimit të drogës. Kontrollet përfshijnë anëtarë të ministrive, zyrtarë të lartë dhe personel që i nënshtrohet procedurave të sigurisë.

Në rastet kur rezultatet rezultojnë pozitive, autoritetet duhet të shqyrtojnë masat e mundshme disiplinore ndaj punonjësve.

Qeveria franceze: Lufta kundër drogës kërkon standarde të njëjta për të gjithë

Kryeministri Lecornu argumentoi se shteti duhet të ruajë besueshmërinë në luftën kundër trafikut dhe përdorimit të drogës, duke theksuar se nuk mund të ketë standarde të dyfishta.

Sipas tij, trafiku i drogës është një nga sfidat më të mëdha të politikës së brendshme të Francës dhe prek të gjitha shtresat e shoqërisë.

"Nuk mund të dënojmë vrasjet e të rinjve në periferi dhe në të njëjtën kohë të tolerojmë përdorimin e drogës në zona të pasura", deklaroi ai.

Lecornu bëri të ditur se testimet nuk do të jenë një masë e përkohshme, por do të vazhdojnë në mënyrë të rastësishme edhe në të ardhmen.

Kontrollet janë shtrirë edhe në selinë e qeverisë franceze, Hôtel de Matignon, ku, sipas raportimeve të mediave vendase, kryeministri dhe bashkëpunëtorët e tij rezultuan negativë në testet e kryera.

Qeveria franceze synon që përmes kësaj nisme të forcojë mekanizmat e sigurisë në administratë dhe të sigurojë që zyrtarët publikë të përmbushin të njëjtat standarde që kërkohen nga qytetarët.