KSAMIL – Një vatër zjarri ka përfshirë mëngjesin e kësaj të hëne një kodër në hyrje të Ksamilit, duke shkaktuar shqetësim për shkak të afërsisë me një resort turistik.

Sipas informacioneve paraprake, flakët kanë shpërthyer rreth orës 04:50 dhe janë përhapur në zonën kodrinore, duke ngritur alarmin për rrezikun që mund të paraqisnin për objektet pranë.

Menjëherë pas njoftimit, në vendngjarje kanë mbërritur forcat e shërbimit zjarrfikës, të cilat po punojnë për izolimin dhe shuarjen e plotë të flakëve, me qëllim parandalimin e përhapjes së zjarrit.

Deri më tani nuk raportohet për persona të lënduar apo dëme në ndërtesat pranë zonës së përfshirë nga flakët.

Autoritetet vijojnë hetimet për të përcaktuar shkaqet e rënies së zjarrit, të cilat mbeten ende të paqarta.