Mali Olimp në Greqi është përfshirë në Listën e Trashëgimisë Botërore të UNESCO-s, duke u njohur për rëndësinë e tij të jashtëzakonshme natyrore dhe kulturore.

Vendimi u miratua unanimisht gjatë sesionit të 48-të të Komitetit të Trashëgimisë Botërore në Busan të Koresë së Jugut. Me këtë përcaktim, Olimpi bëhet një nga zonat e rralla në botë që klasifikohet si pronë e përzier e Trashëgimisë Botërore, për shkak të vlerave të saj si në aspektin kulturor, ashtu edhe në atë natyror.

I njohur në mitologjinë greke si vendbanimi i 12 perëndive olimpike, Mali Olimp është gjithashtu një nga zonat më të pasura me biodiversitet në Evropë. Në këtë zonë gjenden rreth 2 mijë lloje bimësh, përfshirë dhjetëra specie endemike që nuk rriten askund tjetër në botë, si dhe një shumëllojshmëri të pasur të faunës së egër.

Përfshirja e Olimpit në listën e UNESCO-s e çon në 21 numrin e vendeve të Trashëgimisë Botërore në Greqi, ndërsa tre prej tyre tashmë janë të klasifikuara si prona të përziera.

Autoritetet greke e kanë cilësuar këtë vendim si një njohje historike ndërkombëtare, që pritet të forcojë mbrojtjen e ekosistemit të malit dhe të rrisë interesin global për një nga simbolet më të njohura të Greqisë.