Francë – Zjarrfikësit francezë po vijojnë betejën për vënien nën kontroll të zjarreve masive që kanë përfshirë jugperëndimin e vendit dhe po afrohen drejt zonave pranë qytetit të Bordeaux.

Kryetari i bashkisë së Bordeaux, Thomas Cazenave, deklaroi se fronti i zjarrit ndodhet rreth 15 kilometra nga periferia e qytetit dhe rreth 25–30 kilometra nga qendra e tij. Ai theksoi se, pavarësisht situatës shqetësuese, aktualisht nuk parashikohet evakuimi i qytetit, ndërsa autoritetet po monitorojnë me kujdes zhvillimin e zjarrit.

Gjatë natës së së dielës, rreth 55 mijë banorë u detyruan të largohen nga banesat e tyre në disa fshatra në jug të Bordeaux, në rajonin e Girondës, një zonë e njohur për vreshtat dhe aktivitetin bujqësor.

Në total, më shumë se 220 mijë persona janë evakuuar në jugperëndim të Francës për shkak të përhapjes së flakëve.

Zjarret kanë goditur disa vende evropiane gjatë ditëve të fundit, veçanërisht Francën dhe Spanjën, ku numri i personave të zhvendosur për shkak të rrezikut nga zjarret ka kaluar 330 mijë.

Jugperëndimi i Francës mbetet një nga zonat më të prekura, me rreth 42 mijë hektarë tokë të djegur, duke e renditur këtë ndër zjarret pyjore më të mëdha në vend që nga Lufta e Dytë Botërore. Që nga fillimi i vitit, flakët kanë përfshirë rreth 98 mijë hektarë sipërfaqe në të gjithë territorin francez.

Kapiteni Nicolas Braz, një nga drejtuesit e operacionit të shuarjes së zjarreve, deklaroi se intensiteti i flakëve ka krijuar kushte të vështira për ndërhyrjen, pasi zjarri po shoqërohet me ndryshime të papritura të erës dhe vorbulla ajri.

Edhe ministri i Brendshëm francez, Laurent Nunez, paralajmëroi se situata mbetet tepër e vështirë, ndërsa zjarri po lëviz në mënyrë të paparashikueshme drejt zonave pranë metropolit të Bordeaux.

Autoritetet vijojnë operacionet me forca të shumta zjarrfikëse dhe mjete ajrore, ndërsa prioritet mbetet mbrojtja e banorëve dhe frenimi i përhapjes së mëtejshme të flakëve.