Boks – Oleksandr Usyk është kthyer në një nga personazhet më të komentuar pas përballjes dramatike mes Anthony Joshuas dhe boksierit shqiptar Kristian Prenga, pasi reagimi i tij emocional gjatë duelit u përhap me shpejtësi në rrjetet sociale.

Joshua kaloi një moment të vështirë në fillimin e sfidës së zhvilluar në “Jeddah Superdome”, ku Prenga e tronditi që në raundin e parë. Boksieri shqiptar e rrëzoi britanikun dy herë brenda pak minutash, duke qenë shumë pranë një prej surprizave më të mëdha të karrierës së tij.

Goditja e parë erdhi vetëm 20 sekonda pas nisjes së duelit, ndërsa pak çaste më vonë Prenga e dërgoi sërish Joshuan në tapet, duke krijuar një situatë të papritur për ish-kampionin e botës.

Megjithatë, Joshua reagoi si një kampion. Ai u rikthye fuqishëm në raundin e dytë dhe arriti ta mbyllte përballjen me nokaut teknik, duke siguruar një fitore të rëndësishme.

Në tribunë ndodhej edhe Oleksandr Usyk, rivali i mëparshëm dhe tashmë miku i Joshuas. Kamerat kapën momentin kur ukrainasi shfaqi qartë emocionet e tij dhe mori një frymë lehtësimi sapo britaniku siguroi triumfin.

Pamjet u bënë menjëherë virale, ndërsa tifozët e interpretuan reagimin e Usykut si një shenjë respekti dhe miqësie mes dy kampionëve të boksit.

“Fytyra e tij tregoi gjithçka”, shkruan një tifoz në rrjetet sociale, ndërsa një tjetër komentoi se Usyk dukej sikur kishte marrë “një frymë të madhe lehtësimi”. Shumë ndjekës theksuan se reagimi i ukrainasit tregoi lidhjen e krijuar mes dy sportistëve.

Për Anthony Joshuan, kjo ishte ndeshja e parë pas aksidentit tragjik automobilistik në Nigeri, ku humbën jetën dy miqtë e tij të afërt, Sina Ghami dhe Latif “Latz” Ayodele. Pas fitores, britaniku ia dedikoi suksesin atyre, duke pranuar se kishte kaluar një nga periudhat më të vështira të jetës së tij.

Triumfi ndaj Kristian Prengës i hap rrugën Joshuas drejt një superndeshjeje të shumëpritur me Tyson Fury, e cila pritet të zhvillohet në fund të këtij viti.