Gostivar – Situata epidemiologjike në Gostivar po shkon drejt përmirësimit, pasi numri i rasteve të reja me probleme gastrointestinale ka shënuar rënie gjatë ditëve të fundit.

Ministri i Shëndetësisë së Maqedonisë së Veriut, Sasho Klekovski, bëri të ditur se shpërthimi epidemik ka hyrë në një fazë qetësimi, megjithatë autoritetet do të vijojnë monitorimin dhe analizat laboratorike për të përcaktuar shkakun e saktë të infektimit.

Sipas të dhënave më të fundit, janë regjistruar rreth 80 raste të reja, një shifër dukshëm më e ulët krahasuar me ditët e mëparshme.

Që nga fillimi i situatës, rreth 4 mijë persona janë paraqitur me simptoma të problemeve gastrointestinale, ndërsa rreth 750 raste janë konfirmuar si sëmundje infektive. Institucionet shëndetësore kanë kryer qindra intervista epidemiologjike për të identifikuar burimin e përhapjes dhe lidhjet mes rasteve.

Megjithëse numri i të prekurve ka filluar të ulet, uji i rrjetit të ujësjellësit në Gostivar ende nuk konsiderohet i sigurt për përdorim. Autoritetet po kryejnë kontrolle të vazhdueshme mbi cilësinë e ujit, përfshirë nivelin e klorit dhe parametrat e tjerë teknikë, ndërsa përdorimi i tij do të lejohet vetëm pasi të përmbushen standardet e kërkuara.

Hetimet për ndotjen e ujit vijojnë, ndërsa dyshimet paraprake lidhen me mundësinë e futjes së ujit nga lumi Vardar në sistemin e furnizimit, përmes një pompe të vendosur në mënyrë të paligjshme, me qëllim rritjen e presionit të rrjetit.

Për këtë ngjarje, Gjykata Penale në Gostivar ka caktuar masën e paraburgimit 30-ditor për tre persona të dyshuar, të cilët përballen me akuza që lidhen me ndotjen e sistemit të furnizimit me ujë.

Qeveria e Maqedonisë së Veriut ka shpallur gjendje krize 30-ditore në Gostivar, ndërsa institucionet vijojnë masat për furnizimin e qytetarëve me ujë të pijshëm deri në normalizimin e plotë të situatës.