Një tas me tërshërë në ditë mund të sjellë përfitime të rëndësishme për shëndetin e zemrës dhe mirëqenien e përgjithshme. Ky ushqim i pasur me fibra është ndër zgjedhjet më të rekomanduara nga ekspertët për personat që synojnë të mbajnë nën kontroll nivelin e kolesterolit, peshën trupore dhe sheqerin në gjak.

Tërshëra përmban fibra të tretshme, veçanërisht beta-glukanin, i cili ndihmon në uljen e nivelit të kolesterolit LDL, i njohur si “kolesteroli i keq”. Nivelet e larta të këtij kolesteroli mund të shkaktojnë grumbullime yndyrore në arterie, duke rritur me kalimin e kohës rrezikun për sëmundje kardiovaskulare.

Zëvendësimi i ushqimeve të përpunuara dhe të pasura me sheqer, si drithërat e rafinuara apo produktet e ëmbla të mëngjesit, me një porcion tërshëre mund të ndikojë pozitivisht në profilin e yndyrave në gjak.

Përveç mbrojtjes së zemrës, tërshëra mund të ndihmojë edhe në menaxhimin e peshës. Fibrat që përmban ngadalësojnë procesin e tretjes dhe krijojnë ndjesinë e ngopjes për një kohë më të gjatë, duke ulur dëshirën për konsum të shpeshtë të ushqimeve gjatë ditës.

Ekspertët theksojnë se kjo mund të ndikojë edhe në reduktimin e yndyrës viscerale, e cila grumbullohet rreth organeve të barkut dhe lidhet me një rrezik më të lartë për hipertension, diabet dhe sëmundje të zemrës.

Studime të ndryshme kanë treguar gjithashtu se konsumimi i tërshërës mund të ndihmojë në kontrollin e nivelit të glukozës në gjak. Fibrat dhe përbërësit antioksidues të saj ndihmojnë organizmin të menaxhojë më mirë përdorimin e sheqerit, duke ndikuar në nivelet e glukozës si në gjendje esëll, ashtu edhe pas vakteve.

Sa i përket ndikimit në tensionin e gjakut, rezultatet e studimeve nuk janë gjithmonë të njëjta. Disa kërkime kanë evidentuar përmirësime, ndërsa të tjera nuk kanë gjetur ndryshime të rëndësishme. Megjithatë, ndikimi pozitiv në kolesterol, peshë dhe kontrollin e sheqerit e bën tërshërën një zgjedhje të vlefshme për një dietë të ekuilibruar.

Sipas Administratës Amerikane të Ushqimit dhe Barnave (FDA), rreth 3 gramë fibra të tretshme nga tërshëra në ditë mund të ndihmojnë në uljen e kolesterolit total me afërsisht 5 për qind. Kjo sasi mund të merret nga rreth një filxhan tërshërë të thatë ose nga disa porcione tërshëre të gatuar.

Ekspertët kujtojnë se tërshëra nuk është një zëvendësim për trajtimet mjekësore, por pjesë e një stili jetese të shëndetshëm, ku përfshihen ushqyerja e balancuar, aktiviteti fizik dhe kontrollet e rregullta shëndetësore.