Kryeministri Edi Rama ka reaguar ndaj kritikave të ardhura pas deklaratave të tij për “Bulevardin e Flamingove”, duke sqaruar se mesazhi i tij nuk ishte drejtuar ndaj kundërshtarëve, por ndaj “mësimeve” që, sipas tij, ka marrë nga flamingot.

Në një reagim të publikuar në rrjetin social X, Rama u shpreh se kërkesat për dorëheqjen e tij vijnë nga persona me të cilët, sipas tij, nuk ka një kontratë politike. Ai theksoi se marrëveshja e tij politike lidhet me rreth 800 mijë shqiptarë që e kanë votuar.

“Besa jonë s’ka asnjë lidhje me ta”, shkroi Rama, duke iu referuar kritikëve që ai i cilësoi si “sorra dhe korba”, ndërsa i përshkroi si pjesë të asaj që ai e quajti “ana e errët e protestës”.

Në reagimin e tij, kryeministri deklaroi se fjala e mbajtur për “Bulevardin e Flamingove” kishte pasur si qëllim reflektimin mbi mesazhet që kishte marrë nga simbolika e flamingove dhe jo një komunikim me kundërshtarët e tij.

Rama u shpreh gjithashtu se protestuesit kanë të drejtën të kërkojnë dorëheqjen e tij deri në vitin 2029, duke theksuar se liria e shprehjes dhe demokracia vlejnë njësoj për të gjithë.

Sipas kryeministrit, mandati i tij politik bazohet te kontrata me qytetarët që e kanë votuar dhe nuk varet nga kërkesat e kundërshtarëve politikë apo kritikëve të tij.