Policia e Lezhës ka zbardhur ngjarjen e ndodhur më 25 korrik në Kurbin, ku mbeti i plagosur me armë zjarri një 22-vjeçar. Si rezultat i veprimeve hetimore, është identifikuar dhe shpallur në kërkim autori i dyshuar.

Sipas njoftimit zyrtar, specialistët për Hetimin e Krimeve të Rënda në Drejtorinë Vendore të Policisë Lezhë, në bashkëpunim me Komisariatin e Policisë Kurbin dhe nën drejtimin e Prokurorisë, kanë shpallur në kërkim shtetasin K. N., 47 vjeç, banues në Sanxhak, Kurbin.

Nga hetimet paraprake dyshohet se 47-vjeçari ka qëlluar me armë zjarri në këmbë shtetasin V. P., 22 vjeç, banues në të njëjtin fshat. I riu ndodhet jashtë rrezikut për jetën.

Policia bën me dije se, pas plagosjes, autori i dyshuar është larguar nga vendi i ngjarjes duke marrë automjetin e 22-vjeçarit nën kërcënimin e armës.

Gjatë këqyrjes së vendit të ngjarjes janë sekuestruar dy gëzhoja, në cilësinë e provës materiale.

Shërbimet e Policisë vijojnë kontrollet për kapjen e 47-vjeçarit dhe gjetjen e automjetit, ndërsa hetimet po zhvillohen nën drejtimin e Prokurorisë për dokumentimin e plotë të rrethanave të ngjarjes.

Materialet procedurale i janë referuar Prokurorisë për veprat penale "Plagosja e rëndë me dashje", "Vjedhja me armë" dhe "Mbajtja pa leje e armëve, armëve shpërthyese dhe municionit".