Kampionet e Kosovës kanë arritur një tjetër sukses në arenën evropiane, duke kaluar në fazën tjetër të kualifikimeve të Ligës së Kampionëve për femra pas fitores ndaj Ludogorets Razgrad.

MITROVICË – Skuadra e Mitrovicës ka shkruar një tjetër kapitull të rëndësishëm në historinë e saj evropiane, duke siguruar kualifikimin në raundin tjetër të Ligës së Kampionëve për femra.

Kampionet e Kosovës mposhtën kampionen e Bullgarisë, Ludogorets Razgrad, me rezultatin 2-0 në ndeshjen e zhvilluar të shtunën në stadiumin “Fadil Vokrri” në Prishtinë.

Mitrovica zhvilloi një paraqitje të sigurt, duke kontrolluar ritmin e lojës dhe duke shfaqur epërsi ndaj skuadrës bullgare. Golat e fitores u shënuan nga Aurora Mulliqi dhe Gresa Berisha, të cilat i dhanë ekipit kosovar një tjetër triumf të rëndësishëm në kompeticionet evropiane.

Ky sukses vjen pas një paraqitjeje bindëse në ndeshjen e mëparshme, ku Mitrovica mposhti kampionen e Moldavisë, Zimbru Chisinau, me rezultatin e thellë 10-0.

Me këtë fitore, skuadra kosovare vijon rrugëtimin në Ligën e Kampionëve për femra dhe mbetet në garë për të arritur rezultate të tjera historike në skenën ndërkombëtare.