KURBIN – Janë zbardhur detaje të reja nga ngjarja me armë zjarri e regjistruar pak minuta më parë në Kurbin, ku mbeti i plagosur një 22-vjeçar.

I plagosuri është identifikuar si Veron Pasha, i cili është transportuar në Spitalin Universitar të Traumës në Tiranë për të marrë ndihmë të specializuar mjekësore.

Sipas informacioneve paraprake, 22-vjeçari ka marrë një plagë me armë zjarri në këmbë, në pjesën e kofshës. Ai ndodhet nën kujdesin e mjekëve dhe, mësohet, gjendja e tij shëndetësore është e stabilizuar.

Ndërkohë, forca të shumta të Policisë së Shtetit kanë rrethuar zonën ku ndodhi incidenti dhe kanë nisur hetimet për zbardhjen e plotë të rrethanave të ngjarjes, si dhe për identifikimin dhe kapjen e autorit ose autorëve.

Deri më tani, motivet e të shtënave mbeten të paqarta, ndërsa pritet një reagim zyrtar nga policia me më shumë detaje mbi ngjarjen.

Kurbin/Informacion paraprak

Më datë 25.07.2026, rreth orës 19:00, është dërguar në spital shtetasi V. P., 22 vjeç, banues në fshatin Sanxhak, Kurbin, i dëmtuar në këmbë, dyshohet me armë zjarri, i cili ndodhet jashtë rrezikut për jetën.

Menjëherë pas marrjes së njoftimit, shërbimet e Policisë kanë shkuar në vendngjarje.

Grupi hetimor, nën drejtimin e Prokurorisë, po punon për sqarimin e plotë të rrethanave të ngjarjes, dokumentimin ligjor të saj, si dhe identifikimin dhe kapjen e autorit/ve.